Жамбыл облысында балалар жаппай уланған: зардап шеккендер саны өсті

Жамбыл облысында уланған балалар саны өсті. Зардап шеккендердің арасында үш айлық бала мен мектеп оқушылары бар, — деп хабарлайды Massaget.kz тілшісі.

Аймақ әкімдігінің баспасөз қызметі мәліметінше, қазір ауруханада 14 бала мен бір ересек адам бар. Тоғыз бала үйде ем алып жатыр. Бір бала жан-жақты тексеру және одан әрі емдеу үшін облыс орталығына жеткізілді.

"Ауруханаға жатқызылғандар арасында балабақшаның 10 тәрбиеленушісі, үш айлық бала және үш мектеп оқушысы бар", — деді Жамбыл облысы әкімдігі өкілі.

Облыс әкімі Ербол Қарашөкеевтің тапсырмасына сәйкес арнайы топ құрылып, олар әр баланың жағдайымен танысып, жағдайды зерделеп жатыр. Оған қоса ауру неден шыққаны анықталып жатыр.

"Меркі аудандық санитариялық-эпидемиологиялық бақылау басқармасы тексеріс жұмыстарын бастады, барлық сынама алынды, қорытындысын күтеміз", — деп жазылған өңір әкімдігі мәліметінде.

Ербол Қарашөкеев туындаған жағдайға байланысты шұғыл кеңес өткізді. Меркі ауданы әкімі Ербол Жиенқұловқа оқиғаға қатысты ақпаратты дер кезінде хабарлау, сырқат балалар мен олардың ата-аналарына жан-жақты қолдау көрсету жүктелді.

Облыс әкімі бұл оқиғаны жеке бақылауда ұстайтынын айта келе, кемшілікке жол берген жауапты тұлғалардың жауапкершілігі қаралатынын қатаң түрде ескертті.

Еске салайық, бұған дейін Жамбыл облысында балалар жаппай уланғаны хабарланды. 17 наурызда Меркі аудандық орталық ауруханасының жұқпалы аурулар бөліміне Меркі ауылы Ойтал учаскесі "Нұрай" бөбекжай бақшасының 10 тәрбиеленушісі жеткізілген.

Оның ішінде 9 жағдай жіті ішек инфекциясы, 1 жағдай энтеровирус инфекциясы диагнозымен тіркелген.

Қызықты жаңалықтар мен видеоларды көру үшін TikTok арнамызға жазылыңыз!