Цифрландыру сапаны күшейтеді

Былтыр цифрлық паспорттау жалпы ұзындығы 5 мың шақырымнан асатын Астана, Атырау қалалары мен Атырау облысының жолдарын қамтыды. Биыл орталық және оңтүстік өңірлердің жолдарын цифрландыру жос­парланып отыр. Цифрлық паспорттау – жолдың әр телімі туралы ақпаратты жинау, өңдеу мен сақтау жүйесі, ұзындығы, жабыны, санаты, таңбалаудың болуы және басқа инфрақұрылымдық элементтер сияқты параметрлерді қамтиды.

Арнайы жылжымалы зерт­хана деректерді жинай­тын жоғары дәлдіктегі камера­лармен, сондай-ақ сенсорлармен жабдықталған.

«Жол желілерін бас­қару жүйесі жолдар мен ин­фр­а­­құрылым туралы де­ректерді сақтап қана қой­май, жолдардың жай-күйі мен қауіпсіздігін диагнос­тика­лауға, бағалауға мүмкін­дік береді. Мысалы, жүйеде Астанадағы көшелер бойын­дағы ағаштардың санын білу­ге немесе шекаралардың ұзындығын есептеуге болады», дейді ҚазжолҒЗИ автомобиль жолдарын диагностикалау басқармасының басшысы Данияр Көшімханов.

Мамандар жол желісіндегі өзгерістерді есепке алу үшін үнемі тексеріп отыру қажет екенін айтады. Мысалы, Астанада қайта паспорттау жеті жылда жолдардың ұзын­дығы 869 км-ден 1 145 км-ге дейін ұлғайғанын анықтады.

Цифрлық паспорттау ен­гізілген алғашқы қалалардың бірі Ақтөбе болды. Мұнда жол­дарды цифрландыру жергі­лікті билікке, жолдарға қызмет көрсетуге қаражат жетіспеушілігі мәселесін шешуге көмектесті. Данияр Көшімханов деректердің қарапайым тапшылығы қыс мезгілінде жолдардың тиісті күтімін қамтамасыз етуге мүм­кіндік бермегенін атап өтті.

«Деректерді түзетіп, жолдардың нақты ұзындығы мен түріне сәйкес бюджетті қайта бөлгеннен кейін Ақтөбе магистральдық көшелерге де, тұрғын алаптардағы жолдарға да қызмет көрсету үшін қаражатты дәлірек бөле алды. Бұл қаражат тапшылығын болдырмауға және өткен мау­сымда жолдарға сапалы қызмет көрсетуге мүм­кін­дік берді. Түзетудің нәти­жесінде техниканы жаңартып, жабдықтар мен материалдарды жеткілікті мөлшерде сатып алуға мүмкіндік туды», деді сарапшы.

Цифрлық паспорттауды енгізу – еліміздің жол инфрақұрылымын цифр­ландыру мен реформалау­да­ғы маңызды қадам. Жол деректерін дәл есепке алу және үнемі жаңартып отыру бюджет қаражатын тиімді пайдалануға, өзгерістер­ге уақтылы жауап беруге және жолдарға қызмет көрсету сапасын арттыруға жағдай жасайды.