Биыл ауылдарда 900-ден астам жоба жүзеге асады

Биыл ауыл халықының 99%-ін орталықтандырылған ауызсу желісімен қамтамасыз ету көзделіп отыр.

Бұл туралы Орталық коммуникациялар қызметінде өткен брифингте Ұлттық экономика вице-министрі Бауыржан Омарбеков айтты. 2019 жылдан бері елде инфрақұрылымды дамыту мақсатында өңірлік стандарттар жүйесі қолға алынды. Жүйеге сәйкес ауылдарды ауыз сумен қамтамасыз ету деңгейі 97,8%-ке, электр қуатымен қамтамасыз ету 99,8%ке жетті. Сондай-ақ биылдан бастап Президенттің Ұлттық құрылтайдағы тапсырмасына сәйкес дамуында алшақтық бар өңірлерді бюджеттен қаржыландыруға басымдық беріледі. Бұл жұмыстар 2027 жылға дейінгі ауылдық аймақтарды дамыту тұжырымдамасы аясында жүзеге асады. «Ауыл – ел бесігі» жобасына бөлінетін қаржы да ұлғаймақ. Жалпы 2019 жылдан бері жоба шеңберінде инфрақұрылымды дамытуға 701 млрд теңге қаржы бөлінді. 2002 ауылда 6600-ге жуық жоба іске асты.

Бауыржан Омарбеков, ҚР Ұлттық экономика вице-министрі:

- Нәтижесінде 5,3 мың шақырым көлемінде инженерлік желілер, сондай-ақ 7,9 мың шақырым ауылішілік жолдар жаңғыртылды. Сонымен қатар басқа да әлеуметтік нысандар жаңадан салынып немесе қайта жаңғыртылды. Биылғы жылға да 500-ге жуық ауылдық аймақтарда 900-ден астам жобаны іске асыруға 176,4 млрд теңге бюджеттен бөлініп отыр. Бұл жобалар да бұған дейін айтқанымдай, әлеуметтік және инфрақұрылымдарды жаңғыртуға бағытталатын болады.