Таланттар танылған күн

Халықаралық театр күні қар­саңында Қалибек Қуаныш­баев атындағы Қазақ ұлттық музыкалық драма театры төрін­де жыл сайын аталып өтетін әдемі дәстүр биыл да жалғасын тапты. Наурыз айының 21-27 күндері аралы­ғын­да өткен «Қаллеки тынысы» спектакльдер шеруіне театр сахнасында бір жыл ара­лы­ғында қойылған жаңа спек­такль­дер қатысып, сарапшылар талқысына түсті.

Елорда көрермендерін Қаллеки театр өнерінің үздік үлгілерімен таныстыруды мұрат еткен айтулы сахна думанына биыл жеті спектакль қатысты. Атап айтсақ, олардың қата­рында М.Әуезовтің «Қарагөз» (ре­жиссері – Гүлсина Мирғалиева), Жәні­бек Әлікеннің Махаббатым – сен» (режис­сері – Бәзіл Сұлтанғазы), италия дра­матургі Эдуардо де Фелиппоның «Әйел құпиясы» (режиссёрі – Болат Ұзақов), «Ертегі түннің әуені» (режиссёрі – Олжас Дәлелхан), Георг Бюхнердің «Войцек» (режиссёрі – Ұлан Қабыл), Төлен Әбдіктің «Парасат майданы» (режиссёрі – Гүлсина Мирғалиева) және Пьер де Бомаршенің «Фигароның үйленуі» (режиссёрі – Нұрлан Жұманиязов) қойылымдары бар.

Бір апта бойы сахна мамандарынан құралған сарапшылар алқасы театр тынысына ден қойып, спектакльдердің толық талдауын жүзеге асырды. Сонымен бірге көрермендер де атаулы өнер мерекесінен қалыс қалмай, театр фойесіне қойылған сауалнаманы толтырып, сүйікті актёрлері мен спектакльдеріне дауыс беріп, өз таңдауын жасау мүмкіндігіне ие болды. «Жүзден жүйрік, мыңнан тұлпар» шыққан үздік жұмыстарға арнайы аталымдар бойынша диплом мен ақшалай сыйлықтар табыс етілді.

Сонымен сарапшылар шешімі бо­йынша, «Театр тарланы» аталымындағы жүлде Төлен Әбдіктің «Парасат майданы» психологиялық драмасындағы Бейтаныс рөлі үшін Қазақстанның еңбек сіңірген қайраткері Нұркен Өтеуілге табысталса, «Үміт» сыйлығы Бейтаныс 2 (жармақ) бейнесі үшін Марғұлан Наменовке берілді. «Екінші пландағы үздік ер адам рөлі» аталымына Мұхтар Әуезовтің «Қарагөз» трагедиясындағы Нарша рөлі үшін Бәзіл Сұлтанғазы, ал «Екінші пландағы үздік әйел рөлі» аталымындағы сыйлыққа Георг Бюх­нер­дің «Войцек» спектакліндегі рөлі үшін Аяужан Малғаждарова лайық деп танылды. Пьер де Бомаршенің «Фигароның үйленуі» музыкалық коме­дия­­сындағы рөлі үшін Әнуар Бектас «Үздік актёр», Эдуардо де Фелиппоның «Әйел құпиясы» драмасындағы Филу­мена Мартурано бейнесі үшін Қазақ­стан­ның еңбек сіңірген әртісі Жанат Чайкина «Үздік актриса» атанды. Сон­дай-ақ сарапшылардың арнайы жүл­десі­мен Мұхтар Әуезовтің «Қарагөз» қо­йы­лымындағы Мөржан рөлі үшін Қазақ­станның еңбек сіңірген қай­рат­кері Майра Омар марапаттал­ды. Ал көрер­мен таңдауы бойынша «Үздік спектакль» тұғырына Қазақ­станның еңбек сіңірген қайраткері, Қ.Қуаныш­баев атындағы Қазақ ұлттық драма театрының көркемдік жетекшісі, режиссёр Гүлсина Мирғалиеваның «Қарагөз» тра­ге­диясы көтерілсе, Қарагөз рөлі үшін «Дарын» Мемлекеттік жастар сый­лы­ғының лауреаты Ақмарал Тана­баева «Үздік актриса», «Парасат май­да­нын­дағы» рөлімен Қазақстанның еңбек сіңірген қайраткері Нұркен Өтеуіл «Үздік актёр» деп ­танылды.