Сенат үшінші сессияда 89 заңды қарады

Парламент Сенаты үшінші сессия барысында 89 заңды қарады , деп хабарлайды 24kz.

Олардың 75-ін мақұлдап, 14-ін Мәжіліске қайтарды. Қаралған заңдардың қатарында 3 кодекс бар. Атап айтсақ, Президенттің тікелей тапсырмасымен әзірленген жаңа Бюджет, Салық және Су кодекстері. Сенат төрағасы Мәулен Әшімбаев Палатаның осы аралықта атқарған жұмысын қорытындылай келе, қылмыстық заңнама жетілдіріліп, басқа да бағыттар бойынша ауқымды жұмыс атқарылғанын атап өтті. Сенат осы сессияда мәслихат депутаттарымен бірлесіп, 50-ге жуық іс-шара өткізді.

«Бір ел – бір мүдде», «Өңір» депутаттық топтары, Инклюзия жөніндегі кеңес, өзге де сараптамалық алаңдар аясында жоспарлы жұмыс жүргізді. Сенатта еңбек адамы, азық-түлік қауіпсіздігі және заң білімін дамыту мәселелеріне арналған 3 парламенттік тыңдау өтті. Спикер сенаторлар тарапынан 170-ке жуық депутаттық сауал жолданып, Үкіметке өзекті мәселелерді шешу жолдары ұсынылғанын айтты.