Елордада Конституцияға енгізілген өзгерістер таныстырылды

Елордада 2022 жылғы Конституциялық түзетулерге түсіндірменің екінші басылымы таныстырылды.

Ата Заңға енген жаңашылдықтар Парламенттің рөлін күшейту жөніндегі қоғамдық сұраныстарды ескерді. Көппартиялық жүйенің дамуына қосымша жағдайлар жасау, Мәжіліс пен мәслихаттарды қалыптастыру кезінде аралас сайлау жүйесін енгізу сынды түзетулер енді. Президент өкілеттілігі бір реттік 7 жылдық мерзіммен шектелді. Елде Конституциялық Сот құрылды. Соның шеңберінде бүгінге дейін 74 нормативтік қаулы қабылданған. Адам құқықтары жөніндегі уәкілдің мәртебесі Ата Заңда бекітілді.

Марат Бәшімов, ҚР Парламенті Мәжілісінің депутаты:

- Парламент 99 заңды биыл ғана қабылдады. Оның бәрінің мақсаты адамның құқықтарын қорғау, әлеуметтік-экономикалық салада өзгерістер, ұлттық қауіпсіздік мәселелері. Сондай-ақ әйелдердің, балалардың құқықтарын қорғайтын, тұтынушылардың құқықтарын қорғайтын заңдар да қарастырылды. Парламенттің қасында құрылған қоғамдық кеңес те бар. Олардың ұсыныстары депутаттарға нақты келеді де біз оны алып заңдардың ішіне кіргіземіз.