Енді жүргізуші куәлігін онлайн ауыстыру қолжетімді

Енді ел азаматтары жүргізуші куәлігін eGov Mobile қосымшасы арқылы онлайн ауыстыра алады. Бұл қызмет құжаттың қолданылу мерзімі аяқталған , құжат жоғалған, ұрланған немесе төлқұжат деректері өзгерген жағдайда қолжетімді, деп хабарлайды Egemen.kz.

Қызметтің басты ерекшелігі – бұрын берілген жеке куәлік немесе төлқұжаттағы фотосуретті пайдалану мүмкіндігі. Алайда, фотосуреті бар құжат соңғы үш жыл ішінде шығарылған болуы тиіс.

Қызметті алу үшін:

• eGov Mobile қосымшасына кіріп, авторизациядан өту;
• «Қызметтер» бөлімінде «Жүргізуші және көлік» санатынан «Жүргізуші куәлігін беру» қызметін таңдау;
• Дайын құжатты алатын ХҚКО-ны таңдау;
• Жүргізуші куәлігін ауыстыру себебін көрсету және фотосурет жүктеу;
• Қолтаңба үлгісін жүктеп, байланыс нөмірін енгізу;
• Мемлекеттік бажды төлеу (4 915 теңге);
• Өтінімді Face/Touch ID көмегімен растау.
• Қызмет нәтижесі «Хабарламалар» бөлімінде қолжетімді болады.

Өтінім мақұлданғаннан кейін жүргізуші куәлігін таңдаған ХҚКО-дан жеке куәлік пен ескі жүргізуші куәлігін ұсыну арқылы алуға болады. Жаңа құжат берілгенге дейін бұрынғы куәлік жарамды болып қала береді (егер оның мерзімі аяқталмаса).

Айта кетейік, қызметті іске қосқаннан бері 7 000-нан астам адам оны пайдаланып үлгерген.