Индонезияда қолтырауындардың шабуылы жиіледі

Индонезияда адамдарға қолтырауындардың шабуылы күшейді. «Рейтер» агенттігінің жазуынша, былтыр елде жыртқыш 180 адамға ауыз салып, оның жартысынан астамы мерт болған, деп хабарлайды 24kz.

«Бұл – әлемдегі ең жоғары көрсеткіш», — дейді мамандар. Аузы апандай қолтырауындардың дене тұрқы 4 метрге дейін жетеді. 1999 жылы Индонезияда қолтырауындарды аулауға тыйым салған заң қабылданды. Сондықтан тұрғындар: «Үкімет тарапынан арнайы қолдау болмаса, жыртқыштармен ашық күресу мүмкін емес», - дейді.

Мунипра, жергілікті тұрғын:

- Маған 7 ай бұрын ғана қолтырауын шабуыл жасады. Өзенге қоқыс тастауға барған едім. Аяқ астынан жыртқыш бас салып, тістеп, жұта бастады. Жан дауысым шықты. Күйеуім естіп, жүгіріп келіп, қолтырауынның аузынан сүйреп алып шыққан. Терең күйзеліске ұшырадым. Қазір суға мүлде жолағым келмейді. Балаларыма да өзенге бармаңдар деймін.