Өскеменде үш қонжық дүниеге келді

Өскемендегі хайуанаттар бағында сирек кездесетін оқиға тіркелді, деп хабарлайды 24KZ. Шанди есімді аю бірден үш қонжықты дүниеге әкелді.

Мамандардың айтуынша, мұндай жағдай өте сирек кездеседі. Әдетте аюлар бір немесе екі қонжық күшіктейді екен. Хайуанаттар бағының қызметкерлері оларға ерекше күтім жасап жатыр. Соның нәтижесінде қонжықтар қоңданып, әрқайсысы бес келіге дейін салмақ қосқан. Қазір олар өте белсенді. Апанынан шығып, келушілердің көңілін көтеріп, тұрғындардың сүйіктісіне айналып үлгерді.

Юлия Шалимова, биолог:

- Аң-құс саны осылай көбейіп жатса, бұл хайуанаттар бағындағы күтімнің дұрыс әрі сапалы екенін білдіреді. Шандиге ерекше күтім жасалды. Барлық қажетті азық түрлері берілді. Енді, мінеки, ол қонжықтарымен бірге келушілердің ықыласына бөленді.