Н.Шархан әлем чемпионатын аяқтады

Мажарстан астанасы Будапештте өтіп жатқан дзюдодан әлем чемпионатының жекелей сыны аяқталуға жақын. Бүгін 100 келіге дейінгі салмақта екі отандасымыз Нұрлыхан Шархан мен Марат Байкамуров ел намысын қорғап жатыр. Нұрлыхан алғашқы жекпе-жегінде өзінің оңай шағылатын жаңғақ емес екенін көрсетті. Түрікмен спортшысын 2 вазари ұпайымен жеңді. Іріктеу кезеңінің екінші айналымында әлемдік рейтинг көшбасшыларының бірі – Бразилия өкілімен күш сынасып, 3 юко және вазари ұпайымен жеңіліп қалды. Ал Марат Байкамуров бірінші белдесуінде Куба өкілінен басым түсті. Әуелі ваззари ұпайын иеленіп, артынша ауырту әдісімен жеңіске жетті. Отандасымыз енді ширек финалға шығу үшін Париж Олимпиадасы мен былтырғы әлем чемпионы, әзербайжандық Зелим Коцоевпен күреседі.

Асылбек Данияр