WAVES саммитінің мақсаты қандай?

Өткен аптада Астанада Үндістандағы « Prasar Bharati» мемлекеттік хабар тарату агенттігінің бас директоры Гаурав Двиведи бастаған делегация бір топ журналиспен кездесті. Басқосудың басты мақсаты – осы жылы 1-4 мамыр аралығында Мумбай қаласында өтетін Әлемдік аудиовизуалды және ойын-сауық саммиті (WAVES) жайында мәлімет беру.

WAVES – медиа және ойын-са­уық (M&E) саласын біріктіретін бі­ре­гей платформа. Оның мақсаты – Үн­діс­тандағы медиа және ойын-са­уық индустриясына жаһандық назар аударуды және осы секторда үндіс­тандық таланттардың шетелдік әріп­тестерімен байланыс орнатуын мақ­сат ететін жетекші халықаралық фо­рум. Бүгінде M&E индустриясы же­дел қарқынмен дамып келеді. Был­тыр оның әлемдік нарығы шамамен 2,96 трлн долларға жеткен. Ал Үндіс­танның M&E индустриясы 2029 жылға қарай 50 млрд долларға жетуі мүмкін.

Г.Двиведи қазақстандық журналистермен кездесуінде WAVES саммиті медиа және ойын-сауық секторының дамуына серпін беру үшін түрлі елден келген ұлттық деле­гацияларды, жаһандық және үнді­стандық сала көшбасшыларын, саясаткерлерді, индустрия өкілдерін және жаңашылдарды бір алаңға жинайтынын жеткізді. Қазақстанның медиа саласы мамандарын да осы саммитке белсенді қатысып, өзара тәжірибе алмасуға шақырды.

«Мұнда саланың болашағы, мүмкіндіктері мен сын-қатері талқы­ланады. Жаһандық M&E секторы кино, теледидар, радио хабар тарату, баспасөз, жаңалықтар, жаңа медиа, жарнама, анимация, визуалды эффектілер (VFX), ойындар мен киберспорт, толықтырылған/виртуалды/кеңейтілген шынайылық (AR/VR/XR), музыка және басқа да салаларды қамтиды», деді ол.

Медиа маманының сөзінен ұққа­нымыз, бүгінде жедел қарқынмен дамып келе жатқан Үндістанның M&E индустриясында да алдына қойып отырған мақсаты зор. Атап айтқанда, Үндістанды жаһандық контент орталығы ретінде қалыптас­тыру және контент экспорттаушысы­на айналдыру, Үндістанның әртүрлі мәдени мұрасын қамтитын бай зияткерлік меншік экожүйесін құру, үнді медиасының жаһандық нарықтағы үлесін арттыру, өз елдерін ірі жаһандық инвестициялық н­арық ретінде қалыптастыруды көз­дейді. Сонымен қатар үнді және ха­лық­аралық серіктестердің страте­гия­лық әріптестіктері мен ынты­мақ­тас­тықтарын дамыту, нарық­ты кеңейту, бірлескен контент өн­діру және өзара толықтыратын мүм­кіндік­терді пайдалану сынды үлкен мақсаты бар.

Г.Двиведи WAVES мүмкіндік­терін пайдалану қай мемлекетке бол­сын пайдалы екенін айтады. Мәселен, қазақстандық мадиа мамандары да жаһандық нарықтарға және аудиторияларға шығу арқылы жаңа іскерлік байланыстарды орнатуға және Craft2Commerce (өнерден бизнеске) трансформациясына ықпал етуге, әріптестік пен ынтымақтастық орнату арқылы бизнестің өсуіне, білім алмасу және үздік тәжірибелерді енгізу арқылы саланың тиімділігін арттыруға, жаһандық индустрия көшбасшыларымен байланыс орнатуға, басқа да мүмкіндіктерге қол жеткізбек. Сонымен қатар WAVES саммиті аясында байқаулар мен көрмелер, іскерлік кездесулер, т.б. іс-шаралар өтеді.