Қалихан Ысқақтың 90 жылдығына арналған ақындар айтысы өтті

«Қарасөздің қарагері – Қалихан». Дәл осындай атаумен Өр Алтайтың төрінде республикалық ақындар айтысы өтті. «AMANAT» партиясы қолдаған айтыс жазушы, драматург Қалихан Ысқақтың 90 жылдығына арналды.

Жыр бәсекесінде еліміздің түкпір-түкпірінен келген 12 ақын сөз сайыстырды. Сөз маржанын сапырған ақындар арасында Серік Қуанған бәсекенің бас жүлдесін қанжығалады. Сыйлықты Шығыс Қазақстан облысының әкімі Нұрымбет Сақтағанов табыстап, ақындарға алғысын жеткізді.

Мақсат Ақанов, айтыскер ақын:

- Қалихан атамыздың мерейтойлық айтысына қатысу 25 жылғы арманым еді. Мен ол кісінің көзін көрдім. 2002 жылы Аягөздегі «Қозы Көрпеш-Баян сұлудың» 1500 жылдық айтысында Қалихан ата өзі келіп, қазылықта болып, батасын беріп кеткен.