Қазақстан мен Қытай арасында жаңа туристік бағыт ашылды

Енді екі елдің саяхатшылары пойызбен емін-еркін қатынай алады.

Алғашқы жолаушылар пойызы Сиань қаласынан Алматыға аттанды. Қазақстанға бет алған туристік пойызбен бірінші болып шыққан саяхатшылар арасында бизнес, ғылым, мәдениет, спорт саласының өкілдері мен мемлекеттік қызметкерлер бар. Сапар аясында мәдени және іскерлік бағдарлама жоспарланған. Сондай-ақ жәрмеңкелер мен экскурсиялар ұйымдастырылып, кездесулер өтеді. Жаңа бағыт аясында кедендік, шекаралық тексеру оңтайландырылып, билет алмасу жүйесі жеңілдетілді. Осының арқасында кіріп-шығу рәсімдері 2,5 сағатқа дейін қысқарды.

Цзинь Ицзе, Қорғас теміржол станциясының қызметкері:

- Халықаралық билеттердің басқа жол жүру билеттерінен айырмашылығы бар. Онда жолаушы туралы қажетті ақпараттың бәрі көрсетіледі. Екі тараптың теміржол басқармаларымен жақсы байланыс орнатылған. Енді жолаушылар тасымалы әлдеқайда жеңілдей түседі.