ШҚО-да 17 жағажай шомылу маусымына дайын емес

Шығыс Қазақстан облысындағы 25 жағажайдың тек 8-і ғана шомылу маусымына дайын.

Облыстық төтенше жағдайлар департаменті осындай қорытынды жасады. Қазір олар жұрт көп жиналатын өзен-көлдерді тексеріп жүр. Сүңгуірлердің көмегімен су астына жиналған қауіпті қоқыс қалдықтары тазартылып жатыр. Сонымен қатар шомылу маусымында қызмет көрсететін 25 құтқару жасағы құрылып, топ құрамына жаңадан қосылған мамандар арнайы дайындықтан өтеді. Жалпы өңірде 74 су қоймасында шомылуға мүлдем тыйым салынды.

Асылан Қапаев, Төтенше жағдайлар басқармасының аға офицері:

– Бүгінгі таңда Өскемен қаласында орналасқан 2 арнайы суға түсу орындары белгіленген. Соларды тексеріс жұмыстарын жүргіздік. Тексеріс жұмыстары барысында этнографиялық парк аумағында орналасқан жағажай толығымен демалушыларды қабылдауға дайын екендігі анықталды. Ал енді Самал паркіне келетін болсақ ол жерде әлі де дайындық жүріп жатыр. Жақында барлығы орындалады.