«Отбасындағы зорлық-зомбылықсыз Қазақстан»: Астанада полицейлерге арналған арт-терапия өтті

Астанада полиция департаментінің Отбасылық-тұрмыстық зорлық-зомбылыққа қарсы іс-қимыл бөлімі қызметкерлеріне арналған арт-терапия семинары өтті, деп хабарлайды El.kz интернет порталы.

Іс-шара «Отбасындағы зорлық-зомбылықсыз Қазақстан» республикалық акциясы аясында ұйымдастырылған. Жиын ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның, ҚР Мәдениет және ақпарат министрлігінің, сондай-ақ Қазақстандағы «БҰҰ-әйелдер» құрылымы Кеңсесінің қолдауымен өтті.

Семинар барысында тәртіп сақшылары кәсіби күйзелістің алдын алу жолдарын, психологиялық тұрғыдан өз-өзіне қолдау көрсету әдістерін үйренді. Сонымен қатар, қатысушылар үшін арнайы арт-терапия сеансы ұйымдастырылды. «Отбасындағы зорлық-зомбылықсыз Қазақстан» науқаны биыл 20 мамыр мен 20 маусым аралығында еліміздің барлық өңірінде өтіп жатыр.

Басты мақсат — қоғам назарын тұрмыстық зорлық-зомбылықтың өзекті мәселесіне аудару, отбасы құндылықтарын, өзара сыйластық пен қолдауды насихаттау, сондай-ақ құқық қорғау органдарының осы саладағы жұмысы жөнінде көпшілікті хабардар ету болып отыр, — деп жазылған елорда әкімдігі таратқан хабарламада.