Ұлттық құрылтайдың маңызы мен міндеті

Құрылтай шақыру дәстүрі жаңғырғанына — төртінші жыл. Алғашқысы — ұлт ұясы Ұлытауда, одан кейін - түркі әлемінің рухани астанасы Түркістанда, былтыр – Сарайшық іргесіндегі Атырауда өтті. Биылғы орны — Көкшетау. Құрылтай не үшін керек, 3 жылда тындырған нәтижесі қандай деген заңды сауал туындайды. Мына сандарға зер салайық: бірінші жыл, яғни Ұлытауда 42, Түркістанда – 106, былтыр Атырауда – 149 ұсыныс түсіпті. Демек, құрылтай «елдік мәселелерді талқылайтын алаңға айналып келе жатыр» дегенмен келісуге болады. Мемлекет басшысы «Ұлттық құрылтай бұл – арқаны кеңге салып отыратын жиын емес. Сән-салтанатпен өткізетін той да емес. Бабаларымыз маңызды шешім қабылдар кезде немесе елге қатер төнген сын сағатта құрылтай шақырған» деген еді.