Жасанды интеллект жол апатының алдын алуға көмектеседі

Елде жыл басынан бері 14 500-ден астам жол-көлік оқиғасы тіркелді. 731 жағдай адам өлімімен аяқталды. Жол апатынан көз жұмғандардың көбі Түркістан облысынан. Мәселеге тіпті Мемлекет басшысы алаңдаушылық білдірді. Енді жол-көлік оқиғаларының алдын алуға жасанды интеллекті пайдаланылады.

Қазір барлық жол камерасы мен интеллектуалды жүйелерді біріктіретін «ТОР» бірыңғай цифрлық платформасы құрылды. Ол көлік қозғалысын бақылауға, іздеудегі көліктерді анықтауға, агрессивті жүргізу фактілерін тіркеуге және жол-көлік оқиғаларының карталарын жасауға мүмкіндік береді. Ал патрульдік полицияның қызметтік автокөліктері жол жүру ережелерінің бұзылуын қозғалыс кезінде тіркейтін мобильді кешендермен жабдықталып жатыр. Сонымен қатар «ақылды жаяу жүргінші өткелі» жүйесін орнату жоспары бар. Қазір елдегі 1,5 млн сыртқы бақылау камераларының 19 мыңы жасанды интеллектімен жасақталған.