Суды үнемдеуге көшкен шаруаларға қолдау бар

Үкімет басшысы сондай-ақ Қызылорда облысына жұмыс сапарымен барды.

Олжас Бектенов мұнда да су шаруашылығы нысандарын аралады. Президент тапсырмасына сәйкес, елде аграрлық секторға су үнемдеу технологиясын енгізуге айрықша көңіл бөлініп отыр. Озық әдіске иек артқандардың бірі — Шиелі ауданындағы «Ақмая» шаруа қожалығы. Үкімет басшысы ырыздығын жерден терген еңбек адамдарымен жүздесіп, егіс басында болды. Сырдария ауданында орналасқан «Әйтек» су торабының жұмысын тексерді. Аймақ атқамінерлері өңірдегі гидронысандардың жағдайын егжей-тегжейлі баяндады. Сапар қорытындысы бойынша Премьер-министр тіршілік нәрін үндемдеуге көшкен шаруаларды ынталандыру қажеттігін айтты.

Абзал Ералиев, облыстық күріш өндірушілер және өңдеушілер қауымдастығының президенті:

- Мемлекет тарапынан жоғары қолдау көрсетіліп жатыр. Қазірдің өзінде облысқа су тартатын насостар берілді. Сондай-ақ су тартатын қондырғылар орнатуға Үкіметтен 1 млрд-қа жуық қаржы бөлінгенін естіп қуанып жатырмыз. Біз егіс көлемін жыл сайын ықшамдап отыруымыз керек. Облысқа, республика қажетті көлемде ғана күріш өнімін өндіруміз қажет.