Биыл отбасылық зорлық-зомбылық бойынша 8 мыңнан астам қылмыстық іс тіркелді

Қазақстан Үкіметі азаматтардың ең осал санаттары – әйелдер мен балалардың қауіпсіздігін қамтамасыз етуді басты бағыттардың бірі ретінде айқындап отыр. Осы мақсатта Ішкі істер министрлігінің құрылымында тұрмыстық зорлық-зомбылыққа қарсы күрес жөніндегі арнайы басқарма құрылды, деп хабарлайды Egemen.kz.

Жаңа заңнамалық өзгерістерге сәйкес, ұрып-соғу және денсаулыққа қасақана жеңіл зиян келтіру енді қылмыстық жауапкершілікке жатқызылды. Биылғы жылдың жеті айында отбасылық зорлық-зомбылық деректері бойынша 8 мыңнан астам қылмыстық іс тіркелген.

Сонымен қатар жаңа құқықтық тетіктердің арқасында соттар 56 мыңнан астам қорғау нұсқамасын шығарып, 19 мыңнан астам құқық бұзушы әкімшілік қамауға алынған. Сондай-ақ мыңдаған әйел мен балаға дағдарыс орталықтарында қажетті көмек көрсетілген.