Көшбасшы студенттер форумы

Халықаралық инженерлік-технологиялық университетінде «Жаһандық студенттік көшбасшылық: дамуы, әсері, әрекеті» атты студент көшбасшылардың халықаралық форумы өтті.

Халықаралық инженерлік-технологиялық университетінің (METU университеті) ректоры, Ұлттық инженерлік акаде­мия­ның корреспондент-мүше­сі Гүлнар Сәрсенбекова форум­ға студенттік өзін-өзі бас­қару институттарының көш­бас­шысы болған, бүгінде жетіс­тікке жеткен жас маман­дар, ғалымдар, бизнес өкілде­рі шақырылғанын жеткізді. Ректордың айтуынша, студент­тік көшбасшылық болашаққа ұмтылысты білдіреді. Ал халық­аралық кеңістікте сұранысқа ие кәсіби маман болу үшін бі­­лім­ді жетілдірумен қатар ру­ха­ни құндылықтарды игеру, экологиялық тұрақтылық, «жасыл экономика», жасанды интеллект сияқты басымдыққа ие салаларды игеру қажет. Биыл университеттің белсенді студент­тері ұсынысымен «Өзін-өзі басқару жылы» жарияланды. Осы бағытта еңбек адамдарын қолдау және студенттер бастамасына демеу көрсететін жобалар басталған.

Қазіргі таңда аталған оқу ор­нында Мысыр, Моңғолия, Қытай, Түркия, Ресей, Марокко, Өзбек­стан, Қырғызстан сияқты 10-нан ас­там елдің студенттері білім алады. Жыл­дан-жыл­ға халықаралық ық­пал­дастық нығайып, бі­лім алмасу жобаларына басымдық беріліп отыр.

Форумға Оңтүстік Кали­фор­ния Лос-Анджелес уни­вер­­­ситетінен респуб­ли­калық «Жас ұлан» балалар және жасөспірімдер ұйымы­ның алғашқы жетекшісі, PhD На­зира Бөлтірікова қатысып, көшбасшы­лық тәжірибесімен бөлісті. «Студент кезімде ертеңгі күн бүгіннен басталатынына мән бермеппін. Оқуымды бітіріп алайын, жұмысқа тұрайын деп көшбасшылықты кейінге қалдыра беретін едім. Қандай ортада жүрсеңіз де, сол ортаны жақсартуға тырысу маңыз­ды екенін кейін түсіндім. Біз­дің студент кезімізде де өзін-өзі басқару ұйымы болды. Көптеген талқылау нәтиже­сіз қалатын сияқты көрінетін. Бірақ уақыт өте келе түсінгенім, дәл осы ұйым болашағымызға үлкен әсер етті. Біз университет­тің шешіміне ықпал етуді үйрендік. Мәселен, көптеген студенттің әлеуметтік мәселелеріне жаңа­­шылдық әкелдік. Үлкен жетіс­тік осылайша қара­пайым әдеттерден басталады», деді ол. Оның айтуынша, озық технологияны игере отырып, өз ортаңды жағымды өзгерістерге бастауда батылдық қажет.

Адам капиталы тақырыбын зерттеп жүр­ген жас ғалым, PhD Алия Қарақожаева жұмыс өнімділігі, жаһандық бәсекеге қабі­летті түлек атрибуттарына тоқталып, өз тәжірибесін айтты. Оның пікірінше, кәсі­би жетістіктер іргетасы уни­вер­ситетте, өзін-өзі басқару ұйымында қалып­тасқан. Ал бәсекеге қабілеттілік тіл табысуға бейім, жаңаша ойлаумен тығыз байланысты.

Сонымен бірге жиында сту­дент Мэти-Корли Исаак Опар (Гана мемлекеті), Глазго университеті «Адам Смит» бизнес мектебінің оқытушысы, PhD Бақыт Төлегенов, Ре­сей биотехнология универси­тетінің профессоры Татьяна Данильчук, Алматы облысы Кеген аудандық мәслихатының төрағасы Алмасбек Нұғман, Алматы қаласы Жастар саяса­ты бөлімінің бастығы Ди­дар Ділдәбек, тағы да басқа­лар көшбасшылық туралы ой-пі­кірлерімен бөлісіп, ұсыныс­тарын ортаға салды.

Сондай-ақ форумда студенттер бас­тамасымен жарық көрген, университет өмірінен ақпарат тарататын «METU life» журналы таныстырылып, білім алушыларды жан-жақты дамыту және құзыреттілігін қалыптастыратын әлеуметтік GPA бағалау құралы таныстырылды. Оған студенттердің барлық жетістігі мен көрсеткіші енгізіліп, жыл соңында үздік студенттер марапатталады.

Ал жиын барысында ашыл­ған кітап алмасу бұрышына ректордан бастап оқытушылар мен студенттер кітап сыйлады. Мұнымен қоса студенттердің ойын еркін жеткізуге мүм­кін­дік беретін әмбебап «Home Reading» кітабы үлесті­рілді. Сондай-ақ «МETU» универ­ситетінің 10-нан аса үздік студен­тіне кәсіпорындар «Жұ­мыс­қа шақыру» сертификатын табыстап, үздік студенттерге «Propanel» кәсіпорны шәкір­тақы үлестірді. Сонымен қатар форум аясында университеттің студенттік құрылыс жасағы құрылып, қатысушылар арнайы көрмені тамашалады.

АЛМАТЫ