Қазақстанда 677 мектеп санитарлық-гигиеналық талапты сақтамаған

Елімізде 677 білім беру ошағы санитарлық-гигиеналық талаптарды сақтамаған. Бұл туралы Үкіметте Премьер-министрінің орынбасары Ермек Көшербаевтың төрағалығымен өткен кеңесте айтылды.

Онда білім беру мекемелерінде балаларды тамақтандыру жүйесін жетілдіру мәселесі талқыланды. Оқу-ағарту министрі Ғани Бейсембаевтың айтуынша, бүгінде 1,8 млн оқушы тегін тамақтанады. Бұған былтыр бюджеттен 205 млрд теңге бөлінді. Биылдан бастап білім беру ұйымдарында тамақтанудың жаңа стандарттары енгізілді. Ермек Көшербаев мектептердегі өнімнің сапасын қатаң бақылап қана қоймай, оларды сақтау және дайындау шарттарына мұқият болу қажеттігін айтты. Сонымен қатар оқушыларды тамақтандыру жүйесінің тиімділігін арттыруға қатысты мемлекеттік органдарға бірқатар тапсырма жүктеді.