Шымкентте Қазақстан атеросклероз қоғамының II съезі өтті

Жүрек-қан тамыры ауруларынан болатын өлім-жітімнің 80 пайызына атеросклероздың асқынуы себеп, дейді мамандар.

Дегенмен, дерттің алдын алуға болады. Дұрыс тамақтану мен салауатты өмір салтын сақтау маңызды. Шымкентте өткен атеросклероз қоғамының кезекті съезінде ауруды ерте диагностикалау және емдеуді жетілдіру мәселесі талқыланды. Отандық кардиологтар мен терапевттер өзара тәжірибе алмасты. Пленарлы отырыстар мен тақырыптық пікірталас ұйымдастырылды. Аудандар мен басқа да қалалардың дәрігерлері онлайн форматта қатысып, мәселеге үн қосты. Мамандар инновациялық технологияларды игеріп, әлемдік стандартпен сапалы медициналық көмек көрсетуге бағытталған бастамаларын ұсынды.

Эльмира Баймұханбетова, қалалық диагностикалық орталықтың бөлім меңгерушісі:

- Жүрек инфарктісі және оның асқынулары, бас-ми инсульті көп кездесіп жатады. Олардың барлығы жүрек қан-тамыр ауруларының асқынуы болып саналады. Сол асқынуларға жеткізбеу үшін инфарктің санын, инсульттың санын азайту үшін, науқастарды дұрыс диспансеризация жасау мақсатында емдеу тәсілдерін, тексеру әдістерін өте өзекті талқыладық.