Оралда қарғын су тас жолды шайып өтті

0:00:00

Жаңалықтарды Telegram арнамыздан оқыңыз!

Түнде Оралдың Деркөл кентінде қарғын су тас жолды шайып өтті. Сарыарқа шағын ауданында қалың қардың еруі салдарынан қалаішілік жолдың ойпатты бөлігіне су жиналып, екі шағын ауданды байланыстыратын жолға жайылған. Облыстық төтенше жағдайлар департаменті мамандарының айтуынша, елдімекендерге қауіп жоқ. Көлік қозғалысы тоқтаған жоқ. Құтқарушылар мотопомпаның көмегімен суды жолдың екінші жағына айдап, қарғын суды тоқтатты.

Жалпы тасқынның алдын алу жөніндегі қалалық штабтың жедел желісіне 150-ден астам шақырту түскен. Кейбір жеке тұрғын үйлердің ауласын су басқан. Мұның себебі тұрғындардың ауладан уақытылы қар шығармауы, дейді жауапты мамандар. Ай басталғалы қаладан 470 мың текше метр қар шығарылып, 30 мың текше метр су сорылған. Сондай-ақ 95 шақырым арық қар мен мұздан аршылған. «Қазгидромет» бүгін өңірде жаңбыр жауып, күн + 10, 16 градусқа дейін жылынатынын ескертті.

Абылай Нұрмақов, қалалық тұрғын үй, коммуналдық шаруашылық бөлімінің басшысы:

Өтінім түседі, соның негізінде түнгі немесе күндізгі ауысым жұмысшылары барған кезде тұрғындардың ішкі ауласынан қар шығармағаны анықталып жатыр. Бірақ оған қарамастан, су сору техникасымен көмектесіп жатырмыз. Су аулаға кіруінің себебі сол қар уақытылы шығарылмаған.

Ардақ Мұратқызы