Шекара маңындағы аумақтарды дамыту бойынша жеке заң әзірленеді

Елде шекара маңындағы аумақтарды дамыту бойынша жеке заң әзірленеді.

Ол Мемлекет басшысының тапсырмасына сәйкес жүзеге асады. Бұдан бөлек экономиканың нақты секторын қаржыландыру көлемі артады. Бұл туралы Премьер-министрдің орынбасары — Ұлттық экономика министрі Серік Жұманғарин мәлімдеді. Сондай-ақ ол Олжас Бектеновтың төрағалығымен өткен кеңесте, әділ және тиімді салық жүйесін дамыту және салықтық әкімшілендіруді жетілдіру жұмыстары туралы да айтты. Сонымен қатар жиында Президенттің Ұлттық құрылтайда берген тапсырмаларының орындалу барысына тоқталды.

Серік Жұманғарин, ҚР Премьер-министрінің орынбасары – Ұлттық экономика министрі:

- Мемлекет басшысы экономикалық өсудің жаңа нүктелерін құруды және өңірлік дамудағы дисбалансты жоюды тапсырды. Осыған байланысты биыл экономиканың нақты секторын қаржыландыру 8 трлн теңгеге дейін ұлғайтылатын болады. Кейінгі жылдары нақты секторларды қолдау көлемін 10 трлн теңгеге дейін жеткізу жоспарлануда.