Жәмила Тиранада топ жарды

Албанияның астанасы – Тиранада күрес түрлерінен Мұхамет Малоның мемориалы аяқталды. Әлемнің әр қирынан жиналған белді балуандардың қатысуымен өткен турнирде еліміздің ұлттық құрамасы да өнер көрсетті.

Аталған жарыста жал­ғыз алтынды Жәмила Бақбергенова олжа­лады. Қатысушылар саны­ның аздығынан 72 кг салмақ дә­ре­жесіндегі бәсекелер айнал­малы жүйе бойынша өтті. Тұсау­кесер кездесуінде Еуро­па чем­пионатының толық жүл­де жи­ынтығының иегері, украи­налық Алла Белинскаядан басым түскен ол келесі белдесуде Александре Юнис Глауденге жол берді. Одан кейін Панамерика ойындарының екі дүркін күміс жүлдегері, аргентиналық Линда Мачукуды жыққан Жәмила Албаниядағы рейтингтік жарыс­тың жеңімпазы атанды.

Аса ауыр салмақта сайысқа түскен Елмира Сыздықова ресей­лік Валерия Трифонова мен ру­мыниялық Александра Анд­же­лиді айқын басымдықпен ұтқанымен, жартылай финалда АҚШ-тың өкілі Димон Гуйлфордтан айласын асыра алмады. Қола медаль үшін сайыста қытайлық Янланьді жеңді.

Еркін күрес шеберлерінің жарысында 86 кг салмақтағы Болат Сақаев пен Рүстем Мырзағалиев қана жеңіс тұғырына көтеріле алды. Алғашқы айналымдарда командалық әріптесі Данияр Қайсанов пен қырғызстандық Мұхамад Абдоллаевты жең­ген Болат жартылай финалда грузиялық Тариэль Гапхрин­дашвилиді жолынын ығыстырды. Финалда америка­лық Чанд­лер Марстеллерге есе жіберіп, күміс медальды мойнына ілді. Рүстем үшінші орын үшін бәсе­ке­де польшалық Себастьян Язержанскиді ойсырата ұтты.

Грек-рим күресі шеберлері турнирді үш қоламен қоры­тын­ды­лады. Жүлде иегер­лері – Ера­сыл Ма­мырбеков, Ер­сін Абиыр (55 кг), Бағдат Сабаз (67 кг). Үшінші орын үшін тар­тыс­та қандастарымыз өз қарсыластарын бас көтертпей ұтты. Ерасыл албаниялық Энди Муканы, Ер­сін қырғыз Ұлан Мұ­рат­бекұлын, Бағдат қы­тайлық Ли Лейді еркін еңсерді.