Заңсыз мигранттармен күрес: 1 240 шетел азаматы елден шығарылды

Оларға бес жылға Қазақстанға кіруге тыйым салынды .

11-14 наурыз аралығында елімізде "Мигрант" республикалық жедел-профилактикалық іс-шарасы өткізілді. Оның барысында көші-қон заңнамасын бұзудың 10 мыңға жуық фактісі анықталды, деп хабарлайды Polisia.kz.

"4,5 мың шетел азаматы елде болу мерзімін бұзған. 2,5 мыңы заңсыз еңбек қызметімен айналысқан. Оның ішінде 60 заңсыз такси жүргізушісі бар. Атап кетсек, бұған дейін жүргізілген арнайы операция кезінде 700-ге жуық заңсыз такси жүргізушісі анықталған болатын. 1240 шетелдік сот шешімімен елден шығарылып, оларға бес жылға Қазақстанға кіруге тыйым салынды. Заң бұзушылардың басым бөлігі жақын шет мемлекеттен келгендер. Бірақ одан бөлек Бангладеш, Египет, Италия, Нигерия және Мадагаскар азаматтары да анықталды. Іздеуде жүрген 20 шетел азаматы ұсталды", – деді ІІМ көші-қон қызметі комитетінің төрағасы Аслан Аталықов.

2 200 қабылдаушы тұлға шетелдіктердің келуі туралы полицияға хабарламағаны үшін әкімшілік жауапкершілікке тартылды. Оларға 12 миллион теңге айыппұл салынды.

Оқи отырыңыз: Қазақстанға мигранттар қай елдерден көбірек келеді

500 қазақстандық жұмыс берушіге шетел азаматтарын заңсыз жұмысқа тартқаны үшін 33 миллион теңге айыппұл салынды. Олардың ішінде бес тұлға осындай әрекетті бұрын да жасаған. Қазір бұл азаматтар қылмыстық жауапкершілікке тартылып жатыр.

"Шетелдіктерге жалған құжаттар рәсімдеген Қазақстан азаматтарына қатысты 12 қылмыстық іс қозғалды. Мысалы, Астана қаласында бір университет жатақханасында комендант 56 еңбек мигрантына студент ретінде уақытша тұруға рұқсат берген. Алматы облысында нотариустың көмекшісі шетелдіктерді "жоқ" мекенжайларға тіркеу үшін жалған сенімхаттар рәсімдеген. Барлық факті бойынша сотқа дейінгі тергеу жүргізіліп жатыр", – деді Аслан Аталықов.