Биыл отандық музейлердің виртуалды желісі іске қосылады – Аида Балаева

Осылайша еліміздің мәдени мұрасы бүкіл әлемге қолжетімді бола түседі .

Мәдениет және ақпарат министрі Аида Балаева Қазақстан музейлерінің виртуалды желісін іске қосу жоспарланып отырғанын айтты, деп хабарлайды inbusiness.kz сайты.

"Биыл Қазақстан музейлерінің виртуалды желісін – "E-Museum" веб-порталын іске қосу жоспарланып отыр. Жаңа платформа визуалды және интерактивті технологияларды пайдалана отырып, еліміздің мәдени мұрасын бүкіл әлемге қолжетімді етуді көздейді", — деді министр Үкімет отырысында.

Ведомство порталдың ерекшеліктеріне тоқталып өтті.

"3D-модельдеу технологиялары енгізіледі. Кез келген елден пайдаланушылар Қазақстанның мәдени мұрасымен таныса алады. Қазақстанның Мемлекеттік музей қорының каталогын жүйелі түрде электронды форматта жүргізу қамтамасыз етіледі. Бұл жоба аясында еліміздегі барлық музейлерден ақпаратты сапалы және толық жинау жүргізіледі, озық әлемдік тәжірибе негізінде музей қорының цифрлық платформасы жасалады", — деді Аида Балаева.