Астанада «Асыл мұра» аудиожинағының тұсаукесері өтті

Қазақ халқының ұлттық ән-күйі мен фольклорлық мұрасы, әлемдік платформаға жүктелді. Астанада Мемлекеттік кеңесші Ерлан Қариннің қатысуымен «Асыл мұра» аудиожинағының тұсаукесері өтті. Жинаққа «Қазақстан» республикалық телерадиокорпорациясының «Алтын қорында» сақталған 1500 аудиошығарма енген. Оның ішінде 400 күй, 300 жыр-терме, 400 халық және халық композиторларының әндері, ертегілер мен бесік жырлар, тіпті аузында ретро әндер бар. Әміре Қашаубаевтың әнін, Дина Нұрпейісованың күйін тыңдаймын дейтін қауым, енді бұл шығармаларды әлемнің жетекші музыкалық платформаларынан тыңдай алады. «Бұл Мемлекет басшысының IV Ұлттық құрылтайда айтқан цифрландыру мәселесінің бір шешімі»,– деді Мемлекеттік Кеңесші Ерлан Қарин.

Ерлан Қарин, ҚР Мемлекеттік Кеңесшісі:

-Қазақтың дәстүрлі музыка өнерінің 1500 туындысы бүгіннен бастап әлемдік онлайн платформа: Apple Music, Spotify, Yandex Music, YouTube Music-қа енді. Сіздерге, біздің аудиторияға енді қолжетімді болады.

Upd: 19.03.2025, 20:40