Семейде су тасқынына қарсы дайындық пысықталды

Семейде су тасқынының алдын алуға бағытталған оқу-жаттығу жиыны өтті, деп хабарлайды 24kz.

Шараға 600-ден аса адам мен 183 арнайы техника тартылды. Құтқарушылар, әскерилер мен еріктілер бірнеше топқа бөлініп, дайындықты пысықтады. Қазір Абай облысы бойынша 22 учаске қауіпті аймақта тұр. Сондықтан облыс орталығынан қар шығаруға жауапты мекемелер тәулік бойы жұмыс істеп жатыр. Биыл Семейден 150 мың текше метрден астам қар шығарылды. «Көктем 2025» оқу -жаттығу жиыны Абай облысына қарасты барлық қала мен ауданда өтті.

Азамат Орынбаев, ТЖД бастығының орынбасары:

- Жол өткелдері, арықтар және елді мекендерден қар шығару жұмыстары жүріп жатыр. Оған қосымша біз ТЖ департаментінің үш құрамын дайындап қойдық. Әрбір топта жиырмадан астам жеке құрам арнайы техникалар, қайықтар су тасқыны қаупі бар елді мекендерге ертерек жіберіледі.