Атырау облысындағы ауданда малды тасқын су бармайтын қауіпсіз аумаққа шығару ұсынылды

Әкімдік тұрғындарға әлеуметтік желі арқылы ескерту берілген.

Атырау облысы Жылыой ауданындағы шаруаларға малды тасқын су бармайтын қыратты әрі қауіпсіз аумаққа көшіру ұсынылды, деп хабарлайды inbusiness.kz сайты ҚазАқпарат сайтына сілтеме жасап.

Жылыой ауданының әкімі Жұмабек Қаражановтың айтуынша, мал шаруашылығымен айналысатын шаруа қожалықтарының жетекшілері мен тұрғындарға әлеуметтік желі арқылы ескерту берілген.

"Шаруаларға малды тасқын су бармайтын қыратты әрі қауіпсіз аумаққа көшіру ұсынылды. Оларға малды уақытылы бақылау, жергілікті атқарушы органдардың өкілдерімен тұрақты байланыста болу міндеттелді", — деді Жұмабек Қаражанов.

Жем өзенінің бір тармағы – Доралы каналынан Қызылжар учаскесіне су шығады. Бұл маңда бірнеше шаруа қожалығы бар.

"Құлсары қаласының бағытында, Жем өзенінің суы жайылуы мүмкін өзге де аумақтарда орналасқан шаруалардың барлығына хабарланды. Негізгі жоспарымыз – қауіп төнген жағдайда Құлсары жақ беттегі шаруашылықтардың малын сақтап қалу. Қарсы бетке су шықса, жайылымға, егістікке барады. Одан қатты қауіп жоқ. Су деңгейі тұрақталғаннан кейін жайылымдық алқапқа суды кезең-кезеңімен жіберетін боламыз", — деді Жұмабек Қаражанов.