Қазақстан Словения бизнесіне қолайлы жағдай жасауға ниетті

Қазақстан мен Словения президенттері шағын құрамдағы келіссөзден кейін кеңейтілген құрамға ойысты. Қасым-Жомарт Тоқаев Балқан түбегіндегі елді Еуропадағы уақыт сынынан өткен сенімді серіктес деп атап, тиімді ынтымақтастықты дамытуға бейіл екенін растады.

Мемлекет басшысы қатынасқа қарқын қосатын бағыттарды атап, бизнеске қолайлы жағдай жасауға ниетті екенін жеткізді. Бұл үшін кәсіпкерлік қызметті реттеудің ашықтығын қамтамасыз ету, инвестицияны қорғау мен экономиканы әртараптандыру көзделіп отыр. Мемлекет басшысы Астанада өтетін Қазақстан-Словения бизнес-форумына ерекше мән беретінін жеткізіп, аталған жиын екі елдің сауда-инвестициялық байланысын одан әрі кеңейтетініне тоқталды.

Қасым-Жомарт Тоқаев, Қазақстан Республикасының Президенті:

- Сіздің бұл сапарыңыз екі ел арасындағы өзара ынтымақтастыққа тың серпін беру тұрғысынан өте маңызды. Жаңа ғана көптеген тақырыпты, оның ішінде халықаралық ахуалға байланысты кейбір нәзік мәселелерді талқылаған аса мазмұнды кездесу өткіздік. Біз екіжақты ықпалдастықты дамытуға ниетті екенімізді қуаттадық. Нақты нәтижелерге қол жеткізу үшін бар күш-жігерімізді жұмсаймыз.

Тараптар сауда, инвестиция, көлік-логистика, маңызды минералдар, цифрландыру, жасанды интеллект, денсаулық сақтау және туризм сияқты перспективті салалардағы ықпалдастық мәселесін қарастырды. Өз кезегінде Наташа Пирц-Мусар серіктестікке серпін беруді қолдайтынын жеткізіп, жоғаы жетістіктерге жететінімізге сенім білдірді.

Наташа Пирц-Мусар, Словения президенті:

- Елдеріміз арасындағы тауар айналымы жыл сайын артып келеді. Өзіңіз айтқандай, Словенияның Қазақстан экономикасына салған инвестициясының көлемі 200 миллион долларға жетті. Бірақ әлеуетіміз бұдан да зор. Осы себепті Астанаға менімен бірге Словенияның жетекші 25 компаниясынан құралған үлкен бизнес-делегация келді. Мен бұған қуаныштымын.