Отандық астықты экспорттау көлемі 58,1%-ға артты

"Қазақстан темір жолы" ұлттық компаниясы" АҚ деректері бойынша, 2024 жылғы қыркүйектен 2025 жылғы 25 мамырға дейін жаңа өнімнің астығын экспорттау көлемі 8,2 млн тоннаны құрады.

Бұл 2023–2024 жылғы сәйкес кезеңмен салыстырғанда 58,1%-ға жоғары, деп жазады inbusiness.kz сайты.

Экспорт көлемінің айтарлықтай артуы қазақстандық астыққа сыртқы нарықтардағы жоғары сұранысты көрсетіп отыр. Сондай-ақ жеткізу географиясын кеңейту және логистикалық инфрақұрылымды жетілдіру бойынша қабылданып жатқан шаралардың тиімділігін дәлелдейді.

Экспорттың негізгі бағыттары дәстүрлі нарықтар болып табылады:

• Өзбекстан – 2,9 млн тонна (+30,3%);
• Тәжікстан – 1,1 млн тонна (+47,7%);
• Ауғанстан – 274 мың тонна (+31,7%);
• Қырғызстан – 192 мың тонна (1,7 есе өсу):
• Иран – 951 мың тонна (17,3 есе өсу);
• Әзербайжан – 632 мың тонна (126,4 есе өсу).

Қазақстан Республикасы Ауыл шаруашылығы министрлігі агроөнеркәсіптік кешеннің экспорттық әлеуетін қолдау және дамыту бойынша, оның ішінде логистиканы оңтайландыру және отандық астықты халықаралық нарықтарға ілгерілету бағытында жұмысты белсенді жалғастыра бермек.

Айта кетейік, еліміз биыл 8 жылдан соң Вьетнам еліне бидай экспортын қайта бастады. Бұдан бөлек Марокко Корольдігіне 60 мың тонна азық-түлік бидайы жөнелтілді.