Биыл 7 өңір құрғақшылыққа тап болуы мүмкін

Мұндай болжамды "Қазгидромет" мекемесінің мамандары жариялады .

Қазақстанның 7 облысының кейбір аудандарында орташа құрғақшылық болжанады, деп жазады inbusiness.kz сайты.

Вегетациялық кезеңнің басында жауын-шашынның көп болуы елдің солтүстік облыстарында атмосфералық ылғалдылық жағдайын жақсартты. Алайда, Қазақстанның солтүстік-батысында, оңтүстік-батысында, оңтүстігінде, оңтүстік-шығысында және орталығында құрғақшылық әлі де сақталуда.

"Алдағы айда жауын-шашын тапшылығы мен ауа температурасының жоғарылауына байланысты жекелеген аумақтарда құрғақшылық болуы мүмкін", – деп атап өтті синоптиктер.

Синоптикалық болжамға сәйкес, маусым айында жауын-шашын республиканың көп бөлігінде нормадан аз болады деп болжануда.

Жауын-шашын мөлшері Павлодар, Шығыс Қазақстан облыстарында, Батыс Қазақстан, Ақмола, Солтүстік Қазақстан облыстарының басым бөлігінде, Абай облысында, Атырау облысының батысында, Қарағанды облысының солтүстік-шығысында нормаға жақын деңгейінде күтіледі.

Алдын-ала есеп бойынша, маусым айында орташа құрғақшылық мына аудандарда күтіледі:

1. Қостанай облысында – Амангелді, Жангелді аудандарында
2. Маңғыстау облысында – Маңғыстау ауданында
3. Қарағанды облысында – Ақтоғай және Шет аудандарында
4. Алматы облысында – Балқаш ауданында
5. Жамбыл облысында – Мойынқұм ауданында
6. Түркістан облысында – Созақ, Қазығұрт, Төлеби, Шардара және Жетісай аудандарында
7. Қызылорда облысында – Қармақшы және Шиелі аудандарында.