Өзбекстан құрамасы Астанада өтетін бокстан Әлем кубогына қатыспайды

Астанада өтетін World Boxing 2025 жылғы Әлем кубогының кезеңіне Өзбекстан құрамасы келмейді.

Бұл ақпаратты ҚР Туризм министрлігіне қарасты Спортты дамыту дирекциясының баспасөз хатшысы Аян Төлеген өзінің телеграм-арнасында растады:

"Ұйымдастырушылармен сөйлестік, өзбек боксшылары мүлде болмайтын секілді…" – деп жазды ол.

Айта кетейік, World Boxing Әлем кубогының кезеңі 30 маусым мен 6 шілде аралығында Астанадағы Жақсылық Үшкемпіров атындағы жекпе-жек сарайында өтеді. Қазіргі таңда турнирге қатысуға 33 елден ұлттық құрамалар ресми түрде тіркеліп отыр. Дегенмен Өзбекстан құрамасы турнирге қатыспауы мүмкін.

Бұл дода биылғы жылдың басты бокс оқиғаларының бірі болмақ. Бұған дейін Қазақстан Астанада өтетін жарысқа ұлттық құраманың ең мықты спортшыларын шығаратынын мәлімдеген болатын. Осы ретте көрші елдің – Өзбекстанның турнирге қатыспауы көптеген жанкүйерлер үшін күтпеген жаңалық болды.

Әлемдік деңгейдегі бокс додасы көрермендер үшін нағыз тартысты шайқастар мен жоғары деңгейлі спорт мерекесі болмақ. Ал Қазақстан құрамасының басты мақсаты – ел намысын абыроймен қорғап, жарыс алаңында өз мықтылығын дәлелдеу.