«Таза Қазақстан»: елордалық спортшылар «Автокөліксіз бір күн» челленджін өткізді

Астана қаласының спортшылары мен бапкерлері «Таза Қазақстан» экологиялық акциясы аясында экологиялық мәдениетті арттыру, қоршаған ортаны қорғау және салауатты өмір салтын насихаттау мақсатында «Автокөліксіз бір күн» республикалық челленджіне белсенді қатысты, деп хабарлайды El.kz интернет порталы.

Елорда әкімдігінің мәліметінше, челленджде олар жеке автокөліктерін пайдаланбай, жұмысқа және жаттығу залына балама көлік түрлерімен барды. Кейбірі велосипедке мінсе, енді бірі қоғамдық көлік пен электросамокат секілді экологиялық таза көлік құралдарын пайдаланып, видеоүндеу жазып, өз әріптестерін аталмыш челленджге шақырды.

Челленджді қолдағандардың қатарында елордалық велошабандоздар – Бралин Мансұр мен Поберевский Богдан, спорттық гимнастика спортшысы Мұрат Асан, сурдо каратэден Айнұр Есмағамбетов, кикбоксинг бөлімінің жаттықтырушысы Рахат Мұхаметрахим, еркін күрес спортшысы Мыңбай Нұрзат, сондай-ақ дзюдо мен шайбалы хоккей жаттықтырушылары бар.

Елордалық спортшылар қала тұрғындарын салауатты өмір салтын ұстануға ынталандыру және қоршаған ортаға жанашырлық таныту мақсатында «Автокөліксіз бір күн» челленджіне белсене қатысты. Барша тұрғындарды #ТазаҚазақстан және #АвтокөліксізКүн хэштегтерімен челленджге қосылуға шақырамыз, – дейді Астана қаласының Дене шынықтыру және спорт басқармасының баспасөз хатшысы Мәдина Айтқалиева.

Сондай-ақ челленджге басқармаға қарасты мекемелердің қызметкерлері мен бапкерлер құрамы да белсенді түрде атсалысып, өз үлестерін қосты.