Мәжіліс төрағасы Құрбан айт мерекесімен құттықтады

Ерлан Қошановтың Құрбан айт мерекесімен құттықтауы Мәжілістің Telegram арнасында жарияланды, деп хабарлайды Egemen.kz.

«Қадірлі ағайын!

Сіздерді қасиетті Құрбан айт мейрамымен шын жүректен құттықтаймын!

Бұл – барша мұсылман қауымы үшін ұлағатты, тағылымды мереке. Адамдарды мейірім мен ізгілікке шақыратын, ұлтымызды ұйыстыратын ұлық мейрам.

Айт күндері жұртшылық бірін-бірі құттықтап, игі тілектер жолдайды. Жақсы істерге ұйытқы болып, шынайы ниетпен мұқтаж жандарға көмектесуге тырысады.

Құрбан айт – рухани кемелденетін кезең. Ол қоғамдағы келісімді, бірлік пен татулықты нығайта түседі.

Мейірбандылық, жанашырлық пен қайырымдылық сияқты халқымызға тән ізгі қасиеттерді дәріптеуге септігін тигізеді.

Ендеше, шуақты мереке елімізге амандық пен бақ-береке әкелсін!

Шалған құрбандарыңыз бен игі амалдарыңыз қабыл болсын!», делінген аталған құттықтауда.