Үндістандағы ұшақ апатынан қаза тапқандар саны 279-ға жетті

Үндістандағы ірі әуе апаты салдарынан көз жұмғандар саны әлдеқайда көп екені мәлім болды, деп хабарлайды Skifnews.kz ақпарат порталы.

Елдің батысындағы Ахмедабад қаласында болған ұшақ апаты орнынан 279 адамның денесі табылды. Бұған дейін 265 адамның қаза тапқаны туралы хабарланған еді.

DW басылымының жазуынша, ресми түрде қаза тапқандардың саны ДНҚ арқылы сәйкестендіру жұмыстары аяқталғаннан кейін жарияланады.

Олардың денесі Ахмедабад ауруханасының мәйітханасына жеткізілді. Мәйіттерді анықтау процесі жалғасып жатыр.

Телеарнаның хабарлауынша, ұшақ бортында жолаушылар мен экипаж мүшелерін қосқанда 241 адам қаза тапқан. Ал жергілікті 33 тұрғын қаза тапты. Оның ішінде медициналық колледж жатақханасында болған он студент бар.

Boeing 787 Dreamliner ұшағы Үндістанның Ахмедабад қаласынан Лондонға бет алған. Ұшақ әуеге көтерілгеннен кейін көп ұзамай апатқа ұшырады. Бортта 242 адам болған. Кейінірек бұл апаттан тек бір жолаушы аман қалғаны белгілі болды.