Алматыдағы Республикалық протез-ортопедиялық орталықта экспресс-протездеу әдісі енгізілді

Бұл орталық – елімізде жеке протездерді бірнеше сағат ішінде орнында жасап шығаруға мүмкіндік беретін инновациялық технологияны енгізген алғашқы мекеме, деп хабарлайды Zakon.kz.

Салыстырмалы түрде айтқанда, бұрын науқастар протездерін 2–4 апта күтуге мәжбүр болатын.

Қызметтің қолжетімділігіне америкалық Amparo компаниясының технологиясы себеп болды. Бұл технология термопластик материалға жылу беру арқылы қажетті пішін беру принципіне негізделген. Аталған әдіс әсіресе асық жілік деңгейіндегі аяқ протездерін жасау барысында тиімді болып отыр.

Компанияның клиникалық сарапшысы Майк Тейлордың айтуынша, протез жасауға арналған жинақты шалғай ауылға да апарып, сол жерде-ақ жасауға болады. Тек бір талап – электр қуатының болуы.

"Біз қазақстандық әріптестерімізді бұл өніммен жұмыс істеуге үйретіп жатырмыз. Бұл өнімнің басты артықшылықтарының бірі – оның толықтай мобильділігі", – деді Тейлор журналистерге берген сұхбатында.

Алматыдағы Республикалық протез-ортопедиялық орталықтың бас технологы Андрей Коржиков – өзі де протез қолданушы және бұл салада мол тәжірибесі бар маман. "24.kz" телеарнасының мәліметінше, ол көптеген модельдерді өз денесінде сынап көрген: жасаудан бастап күнделікті қолдануға дейін. Оның айтуынша, жылдам жасалатын жаңа конструкция – үлкен артықшылық.

Алдағы жоспар – экспресс-протездеуді орталықтың филиалдары мен аймақтық бөлімшелерінде де қолжетімді ету.

Қызмет МӘМС (міндетті әлеуметтік медициналық сақтандыру) аясында көрсетіледі.

Бұған дейін Денсаулық сақтау министрлігі МӘМС-ті жою жөніндегі петицияға пікір білдіргендігін жазған болатынбыз.