600 каратэшінің басын қосқан халықаралық турнир

Астанада каратэнің WKF бағыты бойынша Kazakhstan Оpen деп аталатын халықаралық турнир өтіп жатыр. Бұл жыл сайын өтетін байрақты бәсеке. Бұған дейін Алматы қаласы қабылдап келді. Соңғы үш жылда Астанада өткізіліп жүр. Негізгі ерекшелігі, биыл алты елдің қатысушылары жиналған. Жыл сайын осылай алыс-жақын шетелдегі каратэшілердің басын қосады және өзара мықтыны анықтайды. Екінші бір ерекшелігі, бұқаралық сипаты. Алты жүзден аса қатысушы жиналған, яғни саны өте көп. Басқа спорт түрлеріне қарағанда жыл сайын осындай көлемде спортшылар жиналып, барлық жас деңгейінде, яғни балалар, жасөспірімдер, жастар арасында және ересектер арасында үздіктерді анықтайды. Тағы бір айта кетер ерекшелігі, мұнда ұлттық құрамаға резерв қаралады. Яғни өскелең толқынның қарым-қабілеті, үлкендерге ізбасарлардың ерекшеліктері деген сияқты көпшіліктің көкейінде жүрген сұрақ, әсіресе, бапкерлердің көкейінде жүрген сұрақтарға дәл осы жарыста жауап алуға тырысады.