Абайға 180 жыл: Абай облысында 200-ге жуық киіз үй орнатылады

Мерейтой қарсаңында Жидебай музей-қорығы аумағында интернет желісі іске қосылды

Бұл туралы Caravan.kz медиа порталы Sputnik.kz-ке сілтеме жасап хабарлайды.

Премьер-министрдің орынбасары Ермек Көшербаев Абай облысына жұмыс сапарымен келіп, Абайдың 180 жылдық мерейтойына дайындық барысын тексерді, деп хабарлады облыс әкімдігінің баспасөз қызметі.

Мерейтой аясындағы негізгі іс-шаралар өтетін орынның бірі — Абай ауданының Қарауыл ауылы жанындағы Қарауылтөбе.

Мұнда 400 көрерменге арналған үлкен дала сахнасы, ат жарысына арналған шеңбер, киіз үйлер қалашығы, кәсіпкерлерге арналған 2500 шаршы метрлік сауда аймағы, сонымен қатар жарық, су, кәріз желілері мен санитарлық инфрақұрылым қарастырылған. Қазіргі уақытта қосымша жолдар салынып жатыр.

«Қарауылтөбеге 184 киіз үй орнатылады. Арнайы жабдықталған дәретханалар қойылып, электр желісі тартылып, жарық шамдары орнатылды. Мерейтой қарсаңында Жидебай музей-қорығы аумағында интернет желісі іске қосылды», — деп жазылған хабарламада.

Ермек Көшербаев Қарауыл ауылындағы республикалық «Жеті қазына» фестивалінің ашылу салтанаты, сондай-ақ «Сұлу әйел» және «Ер жігіт» сайыстары өтетін саябақта да болды.