Жаңаарқадағы жаңа орталық

Жаңаарқа кентінде жас кәсіпкер Жанар Әшірова автокөліктің майын ауыстыруға арнал­ған техникалық қызмет көрсету орталығын ашты. Аталған нысан Жаңа­­арқа ауданы әкімінің жастарға арналған осы жылдағы гранты аясында жүзе­ге асқан.

«Мемлекет басшысы 2025 жылды «Жұ­мыс­шы мамандықтары жылы» деп жария­лады. Бұл – нақты іске, еңбекке, кәсіпке бет бұрған жастарды қолдаудың айқын белгісі. Аудан бойынша 41 жас гранттық конкурсқа қатысып, 20 жас кәсіпкер жеңімпаз атанды. Солардың бірі – Жанар Қасымбайқызы. Бүгін ашылып отырған нысан – жас кәсіпкердің еңбегі мен ізденісінің нәтижесі», дейді аудан әкімі Қанат Қожықаев.

Жаңа техникалық қызмет көрсету пункті кент тұрғындарына қолжетімді әрі сапалы қызмет көрсетуге бағытталған.

«Мемлекет басшысы Қасым-Жомарт Тоқаев халыққа Жолдауында шағын және орта бизнеске мемлекет жағдай жасау керек дегенді үнемі айтып келеді. Біз орталықта көлік моторының майы­н сатамыз. Майды сатып қана қоймай, ауыстырып береміз. Майдың түрлері өте көп. Барынша қамтуға тырысып жатырмыз. Тұтынушы майды сатып алса, тегін құйып береміз. Аудан бойынша мұндай қызмет бізде ғана бар. Сапалы қызмет алған жолау­шы уақытын үнемдейді. Сонымен қатар көлікке арналған түрлі аксессуар да сатамыз. Балаларымен келген жандарға арналған демалыс орны бар. Салқын сусындар да ұсынамыз», дейді Жанар.

Кәсіпкер алдағы уақытта кәсіп ауқымын кеңейтіп, жаңа жұмыс орындарын ашуды көздеп отыр.

Ұлытау облысы