Газада соңғы бір тәулікте аштықтан 5 адам көз жұмды

Бұл туралы Газа секторындағы Денсаулық сақтау министрлігінің бас директоры Мунир әл-Бурш мәлімдеді.

Соңғы тәулікте аштық пен тойып тамақ ішпеудің салдарынан тағы бес палестиналық қайтыс болды. Олардың екеуі – бала, деп хабарлайды inbusiness.kz сайты.

Осылайша, Газада аштықтан көз жұмғандардың жалпы саны 217 адамға жетті, оның ішінде 100-і – балалар.

Израильдің қатаң блокадасы мен үздіксіз шабуылдары азаматтық инфрақұрылымға ауыр соққы беріп отыр. Ресми дерек бойынша, Газа аумағының шамамен 88%-ы қираған. Израиль әскері күн сайын әуе соққыларын жасап, эвакуация туралы бұйрықтар шығарады. Соның салдарынан екі миллионға жуық адам үйлерін тастап кетуге мәжбүр болған, олардың көпшілігі бірнеше рет көшіп-қонған.

Азаматтар уақытша тігілген, тығыз орналасқан және антисанитариялық шатырларда тұрып жатыр. Гигиена құралдарының жетіспеушілігі індеттердің таралуына әкеліп соғуда.

Жергілікті және халықаралық ұйымдар Израильді аштық пен ауыз су тапшылығын соғыс қаруы ретінде қолданды деп айыптап отыр. Әскерилер көшіп-қонған адамдарға арналған лагерьлерге және бейбіт тұрғындар бас сауғалаған нысандарға соққы беруді жалғастырып келеді.