Ресейден экстрадицияланды: жасөспірімге сексуалдық зорлық жасады деген күдікті ұсталды

Қазіргі уақытта күдікті тергеу изоляторына қамалды.

Қазақстанның бас прокуратурасы кәмелетке толмаған балаға сексуалдық сипаттағы зорлық-зомбылық жасады деген күдікке ілінген Қазақстан азаматын Ресейден экстрадициялады, деп хабарлайды ведомствоның баспасөз қызметі.

"Күдікті 2024 жылғы қарашада Қостанай облысында ата-анасымен достық қарым-қатынастағы жасөспірімнің пәтеріне келген. Жәбірленушімен екеуі жалғыз қалғанда, оның жасы мен психикалық ауруы туралы біле тұра, ер адам оған қатысты жыныстық сипаттағы зорлық-зомбылық жасаған", – делінген хабарламада.

Осы қылмысты жасағаннан кейін күдікті Қазақстан аумағынан шығып кетіп, осыған байланысты халықаралық іздестіруге жарияланды.

Оқи отырыңыз: "Шығыстың шырқын ұрылар бұзып тұр" – ІІМ мен Бас прокуратура қосымша тексеру жүргізеді

Өткен жылы ол Ресей Федерациясының Челябі облысында ұсталып, бас прокуратураның сұрауы бойынша Қазақстанға экстрадицияланды. Қазіргі уақытта күдікті тергеу изоляторына қамалды.

Мұндай қылмыс үшін 15 жылдан 17 жылға дейінгі мерзімге бас бостандығынан айыру түріндегі жаза қарастырылған.