Күзгі әскерге шақыру науқаны басталды

Елде әскерге шақыру тәртібі өзгерді.

Енді азаматтарға бұрынғыдай қағаз жүзінде емес, ұялы телефондарына СМС-хабарлама немесе электронды үкімет порталы арқылы шақырту келеді. Бұл заң жүзінде бекіген ресми хабарлама. Қарулы күштер Бас штабы департаменті бастығының орынбасары осылай деп, саланың сандық жүйеге көшіп жатқанын мәлімдеді. Айтқандай, бүгінде ел бойынша күзгі әскерге шақыру науқаны басталды. Алдағы төрт айда 22 мың жас әскер қатарына шақырылады. Ал шақыруды елеп-ескермегендерге тиісті жауапкершілік қарастырылған.

Фархат Айдарбаев, ҚР Қарулы Күштері Бас штабы департаменті бастығының орынбасары:

- Егер әскери шақыру басқармасына келмейтін болса, ол жерде 5 АЕК айыппұл салынады. Ал егер әскери комиссариатқа келіп бірақ мёд.сараптамадан қашып жалтарса ескерту немесе 3 АЕК штраф алады. Ол әсер етпейтін болса ҚК 386-бабына сәйкес мың АЕК айыппұл немесе 1 жылға бас бостандығынан айырылады.