Лауазымды тұлғалардың ұсталғаны жөнінде хабар тарады: Аида Балаева расталмаған ақпаратты тексеруге шақырды

Министр жалған ақпарат таратқаны үшін қылмыстық жауапкершілік барын еске салды.

Мәдениет және ақпарат министрі кейбір ресми бұқаралық ақпарат құралдары мен анонимді Telegram арналарында мемлекеттік қызметшілердің ұсталуына қатысты ақпарат таралуына байланысты пікір білдірді.

"Таратылатын ақпараттың шынайылығын тексеру міндеті, кінәсіздік презумпциясы қағидаты, сондай-ақ журналистік этика бар екенін есте сақтау қажет. Кейде расталмаған "хайп" мәліметтердің соңынан қуалай отырып, журналистер мұндай ақпарат азаматтар мен олардың жақын туыстарына зиян тигізуі, ар-намысы мен қадір-қасиетіне нұқсан келтіруі, негізінен жала жабу болып саналуы мүмкін екенін ұмытпауы тиіс", – деп жазды мәдениет және ақпарат министрі Аида Балаева.

Министр журналистерді кәсіби БАҚ пен журналистер сақтауға тиіс міндеттемелерді ұстануға шақырып, сондай-ақ жалған ақпарат таратқаны үшін әкімшілік және қылмыстық жауапкершілік қарастырылғанын еске салды.