Қазақстанда 285 мың адам жұмыссыз қалды. Әлеуметтік төлемді қалай алуға болады?

МӘСҚ төлемі 6 айға дейін беріледі

2025 жылғы 1 қазандағы жағдай бойынша Мемлекеттік әлеуметтік сақтандыру қорынан (МӘСҚ) жұмысынан айырылуына байланысты әлеуметтік төлем алушылардың саны 285,2 мың адам болды, деп хабарлайды Еңбек және халықты әлеуметтік қорғау министрлігі.

"Биыл олардың ішінде 240,5 мың адамға төлем алғаш рет тағайындалған. Төлемдердің жалпы сомасы 95 млрд теңгеге жетті. Қолданыстағы заңнамаға сәйкес жұмыстан босатылған азаматтар міндетті әлеуметтік сақтандыру жүйесіне қатысу өтіліне және соңғы 24 айдағы табысына қарай 1 айдан 6 айға дейін әлеуметтік төлем алады. Бұл төлемдер жоғалған кірістің 45%-ына дейінгі мөлшерде МӘСҚ қаражаты есебінен жүргізіледі", – делінген хабарламада.

Жұмысынан айырылған азамат төлем алу үшін eGov.kz порталында немесе enbek.kz сайтында онлайн өтініш бере алады. Жұмыссыз ретінде тіркелгеннен кейін жүйе автоматты түрде SMS-хабарлама жібереді. Азамат келісімін SMS арқылы растаған жағдайда төлем проактивті форматта автоматты түрде тағайындалады.

Оқи отырыңыз: Алматыда ботаникалық бақ қысқы жұмыс кестесіне ауысты