Маңғыстау облысында мысық тістеген әйел құтырма ауруынан көз жұмды

Кейінгі рет өңірде дәл осындай қайғылы жағдай 21 жыл бұрын болған екен.

Маңғыстау облысында мысық тістеген әйел құтырма ауруынан көз жұмды, деп хабарлады 31 арнаның Информбюро ақпараттық бағдарламасы.

Мамандардың айтуынша, 43 жастағы келіншек дер кезінде медициналық көмекке жүгінбеген. Сондықтан науқасты ажалдан арашалап қалу мүмкін болмады деп отыр. Тамыз айында Бейнеу ауданының тұрғынын қаңғыбас мысық маңдайынан тістеп алған екен. Бірақ әйел дәрігерлерге қаралмай, жарақатын өзі емдепті. Бір айдан кейін дерті асқынып, ауыр халде емдеу мекемесіне жеткізілген.

Тиісті көмек көрсетілгенімен науқас үш күннен соң ажал құшқан. Мамандар құтырманың емі жоқ екенін ескертеді. Дегенмен, жануар тістеген немесе тырнаған жағдайда дереу екпе салдырса, аурудың алдын алуға болатынын айтады. Кейінгі рет өңірде дәл осындай қайғылы жағдай 21 жыл бұрын болған екен.

"Белгісіз мысық тістегеннен науқас аудандық аруханаға келіп, медициналық көмекке жүгінген. Сол кезде 23 қыркүйекте құтырма диагнозы қойылып, осы диагноз дәлелденіп, өкінішке орай 26 қыркүйек күні ол адам осы құтырма ауруынан көз жұмды. Себебі бүгінгі күнде құтырма ауруының емі жоқ. Зардап шеккен кезде дер кезінде антирабикалық көмекті алу үшін медициналық көмекке жүгіну қажет", – деді Маңғыстау облысы санитариялық-эпидемиологиялық бақылау департаменті басшысының орынбасары Гүлнар Көркінбаева.