Аида Балаева волонтерлерді құттықтады

2025 жылғы 5 желтоқсанда Қазақстан Республикасының премьер-министрінің орынбасары – мәдениет және ақпарат министрі Аида Балаева волонтёрлерді Халықаралық еріктілер күнімен құттықтады, деп хабарлайды Zakon.kz.

Оның құттықтау хаты министрліктің Telegram-каналында жарияланды.

Құрметті волонтёрлер! Құрметті достар!

Сіздерді Халықаралық волонтёрлер күнімен шын жүректен құттықтаймын!

Қазіргі кезде волонтёрлік қозғалыс еліміздегі қоғамдық өмірдің ажырамас бөлігіне айналды. Сіздер мәдениет пен білім, экология мен медицина, әлеуметтік қолдау мен қайырымдылық салаларының дамуына үлес қосып келесіздер.

Кейінгі жылдары Қазақстанда волонтёрлікті мемлекеттік қолдаудың біртұтас жүйесі қалыптасты, ол әрқашан мемлекеттік саясаттың назарында.

Дәл бүгін БҰҰ-ның Нью-Йорк қаласындағы Штаб-пәтерінде Орнықты даму жолындағы Халықаралық волонтёрлер жылы ресми бастауын алады.

Аталған жылды жариялау туралы ұсыныс Қазақстан Республикасының Президенті Қасым-Жомарт Кемелұлы Тоқаевтың бастамасымен жүзеге асқанын мақтан тұтамыз.

Қазақстан үшін Халықаралық жыл орнықты даму мақсаттарын іске асырудағы волонтёрлердің рөліне баса назар аудара отырып "Бірге – тұрақты болашақ үшін!" ұранымен жақсылық пен бірліктің жалпыхалықтық мерекесіне айналады.

Атаулы жыл жаһандық серіктестік рухында жаңа мүмкіндіктер ашатынына және миллиондаған адамдарды тұрақты, әділ және бейбіт әлем құрудың ортақ ісіне қатысуға шабыттандыратынына сенімдіміз.

Құрметті волонтёрлер!

Мемлекет сіздердің белсенділігіңізді, азаматтық ұстанымыңыз бен жасампаз істеріңізді жоғары бағалайды. Біз волонтёрлік бастамаларды одан әрі қолдаймыз және даму үшін мүмкіндіктерді арттырамыз.

Барлық волонтёрлерге еліміздің дамуына қосқан үлесі, табандылығы, мейірімділігі мен өз ісіне адалдығы үшін шын жүректен алғыс айтамын. Сіздердің игі істеріңіз әрқашан құрмет пен қолдау тауып, адамдарға қуаныш пен шаттық әкелсін.

Сіздерге зор денсаулық, амандық, күш-қуат және қоғамға қызмет ету жолында табыс тілеймін!