Иран Трамптың ұсынысын қабылдамай қойды

Иран АҚШ-тың ядролық бағдарлама бойынша келіссөз жүргізуді сұраған ресми хатын алды, деп жазады inbusiness.kz сайты BBC басылымына сілтеме жасап.

Хатты Тегеранға барған Біріккен Араб Әмірліктері президентінің дипломатиялық кеңесшісі Анвар Гаргаш Иран Сыртқы істер министрі Аббас Аракчиге берген.

Аятолла Әли Хаменеи хатты алған соң АҚШ-пен келіссөз жүргізуден бас тартты.

Ол Трамптың келіссөздер туралы ұсынысын "алдау" деп есептейді.

– Біз олардың келіссөз ережесін орындамайтынын біліп тұрсақ, келіссөздің керегі не? Сондықтан келіссөзге шақыру... қоғамдық пікір арқылы алдау, – деді ол.

Аятолла Әли Хаменеи Иран соғыс қаламайтынын жеткізді.

– Иран соғыс іздемейді, бірақ америкалықтар және олардың агенттері қате қадам жасаса, біздің жауабымыз шешуші әрі нақты болады. Одан Америка көп зардап шегеді, – деді ол.