Сырдария өзенінде сең жүріп жатыр

Мұзды қауіпсіз өткізу үшін 13 мыңнан аса бау қамыс, құм толтыруға арналған 3,5 мың қап дайын тұр.

Қазір Қызылорда облысының оңтүстік және орталық бөлігі мұздан толығымен тазарған, деп хабарлайды inbusiness.kz сайты.

Күн райының күрт жылынуы өзенде тағы да сең жүре бастауына әкелді.

Мамандар Сырдария өзеніндегі жағдайдың күнделікті бақылауда екенін айтады.

– Өзеннің оңтүстік және орталық бөліктері мұздан тазарды. Арал және Қазалы аудандарының аумағында толық мұз ұстасып тұр. Ал Қармақшы ауданы аумағының 90% бөлігі мұздан тазарды, – дейді "Қазсушар" РМК облыстық филиалы директорының орынбасары Айдос Асанбаев.

Су тасқыны қаупінің алдын алу үшін өткен мезгілде осал қорғаныс бөгеттерінің 5,4 шақырымы нығайтылған.

– Наурыз айында өзен иірімдеріндегі мұзды қауіпсіз өткізу үшін де 13,2 мың бау қамыс, қада сияқты 3,1 мың инертті материалдар қоры жинақталды. Сонымен қатар, 10,1 тонна дизель отыны, 2,5 тонна бензин және құм толтыруға арналған 3,5 мың қап дайын. Республикалық меншіктегі стратегиялық маңызы бар 4 су торабы транзиттік режимде жұмыс істеп тұр, – деп қоса кетті "Қазсушар" РМК облыстық филиалы директорының орынбасары.